ជួប សម្លាប់ ទូរស័ព្ទទៅប្រពន្ធមុនពេលបាញ់សម្លាប់លោកបណ្ឌិត កែម ឡី

ភ្នំពេញៈ បុរសម្នាក់ដែលត្រូវបានចោទប្រកាន់ពីបទបាញ់សម្លាប់អ្នកវិភាគនយោបាយល្បីឈ្មោះ លោកបណ្ឌិត កែម ឡី កាលពីថ្ងៃអាទិត្យបានទូរស័ព្ទទៅប្រពន្ធរបស់គាត់ជាច្រើនដងពីផ្ទះសំណាក់នៅយប់មុនថ្ងៃកើតហេតុដោយនិយាយថា «គាត់ដេកមិនលក់»។ នេះបើតាមនគរបាលមូលដ្ឋានដែលបានសម្ភាសគ្រួសារគាត់។

លោក អឿត អាង ហៅ ជួប សម្លាប់ អាយុ ៤៤ ឆ្នាំត្រូវបានចោទប្រកាន់កាលពីថ្ងៃពុធពីបទឃាតកម្មគិតទុកជាមុន និងកាន់កាប់អាវុធដោយខុសច្បាប់បន្ទាប់ពីបាញ់សម្លាប់លោក កែម ឡី ជាមួយនឹងកំាភ្លើងខ្លីម៉ាក Glock ខណៈលោកកំពុងផឹកកាហ្វេនៅហ្គារ៉ាស់សាំងកាល់តិច បូកគោ ក្នុងរាជធានីភ្នំពេញ។

បើទោះបីជាលោក អាង «សារភាព» ទៅនគរបាលកាលពីថ្ងៃពុធថាគាត់បាញ់លោក កែម ឡី គឺដោយសារលោក កែម ឡី ជំពាក់លុយគាត់ក៏ដោយ ក៏សមាជិកគ្រួសាររួមទាំងប្រពន្ធ និងម្តាយរបស់គាត់មិនដែលឮជនសង្ស័យនិយាយអំពីឈ្មោះ លោក កែម ឡី ឬការជំពាក់ប្រាក់អ្វីនោះទេ។

ខណៈសាធារណជនជាច្រើនយល់ថាការបាញ់សម្លាប់ជារឿងនយោបាយនគរបាលស្រុក និងខេត្តបានចំណាយពេលជាច្រើនម៉ោងសាកសួរគ្រួសាររបស់លោក អាង រួមទាំងប្រពន្ធរបស់គាត់រស់នៅក្នុងឃុំនគរភាសស្រុកអង្គរជុំ ខេត្តសៀមរាប។

អធិការស្រុកអង្គរជុំលោក ម៉ាន់ សុខហាប់ បានឲ្យដឹងថាជនសង្ស័យដែលបានចាកចេញពីស្រុកទៅរាជធានីភ្នំពេញកាលពីថ្ងៃទី ១ កក្កដា ត្រូវបានគ្រួសាររបស់គាត់និយាយថាគាត់ដេកមិនលក់ទាល់តែសោះនៅយប់មុនអំពើឃាតកម្មដោយទូរស័ព្ទទៅប្រពន្ធរបស់គាត់ចំនួន ៥ ដង។