ងងឹតពេក ! លបកាប់ច្រឡំចំបងប្រុងបង្កើតខ្លួនឯង

ខេត្តត្បូងឃ្មុំ ៖ ដោយសារតែយប់ងងឹតពេក ធ្វើឲ្យជនដៃដល់កាប់១ចបច្រឡំមនុស្សបណ្ដាលឲ្យចំគុម្ពត្រចៀកឆ្វេងហូរឈាមស្រោចពេញខ្លួន ។ ហេតុការណ៍នេះកើតឡើងកាលពីវេលាម៉ោង៧ និង៣០នាទីយប់ ថ្ងៃទី១៥ ខែកក្កដា ឆ្នាំ២០១៦ នៅភូមិជើងវត្ត សង្កាត់វិហារហ្លួង ក្រុងសួង ។

លោកវរសេនីយ៍ទោ ឈន សុធន អធិការនគរបាលក្រុងសួង បានប្រាប់ឲ្យដឹងថា មុនពេលកើតហេតុបុរសជាប្អូនថ្លៃ ឈ្មោះ ថោង វណ្ណា ហៅ ម៉ិ អាយុ២៣ឆ្នាំ និងបងថ្លៃប្រុសឈ្មោះ ប៉ុន ឌីន ហៅ បេង អាយុ៣៧ឆ្នាំ បាននាំគ្នាផឹកស៊ីនៅផ្ទះ លុះស្រវឹងធ្លាក់ភ្នែករៀងៗខ្លួនក៏ទាស់ពាក្យសម្តីគ្នារហូតប្អូនថ្លៃខឹងសម្បារយ៉ាងខ្លាំងក៏បានវាយបងថ្លៃឡើងខៀវភ្នែកតែម្តង ។

លោកវរសេនីយ៍ទោ ឈន សុធន បន្តទៀតថា ដោយឃើញបងថ្លៃនិងប្អូនថ្លៃឈ្លោះគ្នាបែបនេះ ឈ្មោះ ថោង សំអាត ត្រូវជាបងប្រុសបង្កើតរបស់ឈ្មោះ ថោង វណ្ណា ហៅ ម៉ិ ក៏បានមកឃាត់កុំឲ្យឈ្លោះគ្នា ។ ពេលនោះឈ្មោះ ថោង វណ្ណា ហៅ ម៉ិ ក៏បានចុះមកដីមុនទាំងមិនអស់កំហឹង រួចក៏ទៅយកចបកាប់ត្រៀមទុកចាំកាប់បងថ្លៃឈ្មោះ ប៉ុន ឌីន ប៉ុន្តែដោយយប់ងងឹតពេកហើយបងប្រុសខ្លួនចុះមកមុន ក៏កាប់ច្រឡំចំបងប្រុសខ្លួនឯងឈ្មោះ ថោង សំអាត ចំក្រោមគុម្ពត្រចៀកឆ្វេងបណ្ដាលឲ្យហូរឈាមស្រោចពេញខ្លួន បង្កឲ្យមានការភ្ញាក់ផ្អើលដល់សមត្ថកិច្ចប៉ូលិសប៉ុស្តិ៍រដ្ឋបាលសង្កាត់វិហារហ្លួងចុះមកចាប់ខ្លួនជនដៃដល់បញ្ជូនទៅកាន់អធិការដ្ឋាននគរបាលក្រុងសួងភ្លាមៗ ចំណែកជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តភ្លាមៗផងដែរ ។

លោកវរសេនីយ៍ទោ ឈន សុធន អធិការនគរបាលក្រុងសួងបញ្ជាក់ថា ជំនាញព្រហ្មទណ្ឌកំពុងតែបំពេញនីតិវិធីច្បាប់ រួមជាមួយនឹងវត្ថុតាងចបកាប់ ដើម្បីបញ្ជូនជនសង្ស័យទៅសាលាដំបូងខេត្ត ដោយចោទប្រកាន់ពីបទហិង្សាដោយចេតនា ៕