កញ្ញា វ៉ាន់ នីឡា ថាការខូចបង់កិត្តិយសរបស់នាង មិនអាចទូទាត់ជាប្រាក់

រាជធានីភ្នំពេញ ៖ ចំណាត់ការតាមផ្លូវច្បាប់ស្វែងរកជនទម្លាយរូបអាក្រាតរបស់តារាចម្រៀងសុខ ចិន្តា ហៅវ៉ាន់ នីឡា នៅមិនទាន់មានពន្លឺនៅឡើយ ។ ទោះបីជាមានការអូសបន្លាយពេលក្តី ក៏តារាចម្រៀងនីឡាបញ្ជាក់ជំហរថា នាងនឹងមិនទទួលយកការសម្របសស្រួលណាមួយក្រៅតុលាការជាដាច់ខាត ។

ថ្លែងបញ្ជាក់មុនពេលឡើងយន្តហោះចេញទៅសម្តែងនៅប្រទេសអូស្ត្រាលីកាលពីល្ងាចថ្ងៃទី៧ ខែកក្កដា ២០១៦ តារាចម្រៀងប្រចាំផលិតកម្ម Pleng Record កញ្ញាវ៉ាន់ នីឡា បានប្រកាសជំហរថា នឹងមិនទទួលការសម្របសម្រួលក្រៅតុលាការទេ គឺដាច់ខាតនាងចង់ឲ្យច្បាប់ដាក់ទោសចំពោះជនដែលទម្លាយរូបថតនាង ដើម្បីទុកធ្វើជាគំរូសម្រាប់ជនដទៃ។ នីឡា រំពឹងខ្ពស់ថា តុលាការនឹងរកយុត្តិធម៌សម្រាប់រូបនាង ។

វ៉ាន់ នីឡា និយាយថា «នាងខ្ញុំនៅតែទទូចចង់បានយុត្តិធម៌ ខណៈដែលកិត្តិយសនាងខ្ញុំត្រូវគេបំផ្លាញដែលនាងខ្ញុំស្ទើរតែមិនហ៊ានដើរចេញក្រៅផ្ទះ ឬប្រឈមមុខក្នុងអាជីពសិល្បៈ ។ ទោះបីជាអ្នកទម្លាយរូបនាងខ្ញុំជាអ្នកណា ហើយបើទោះបីជាមានអ្នកជួយអន្តរាគមន៍ពីក្រោយប៉ុនណាក្តី ក៏នាងខ្ញុំនឹងតស៊ូជម្នះដល់ទីបំផុត ។ បើទោះបីជារងការគំរាមគាបសង្កត់ ឬផ្តល់ប្រាក់ឲ្យនាងខ្ញុំច្រើនសន្ធឹកសន្ធាប់យ៉ាងណាក៏ដោយ ក៏នាងខ្ញុំមិនបោះបង់ ឬដកពាក្យបណ្តឹងទៅកាន់អ្នកធ្វើឲ្យនាងខ្ញុំបាត់បង់កិត្តិយសដែរ ។

ចាកចេញទៅសម្តែងនៅប្រទេសអូស្ត្រាលីចំនួន៥សប្តាហ៍ក្តី ក៏ដំណើរចេញទៅរបស់នាងខ្ញុំនឹងមិនប៉ះពាល់ដល់ករណីប្តឹងប្តល់នោះទេ ព្រោះតែនាងខ្ញុំបានពិភាក្សា និងប្រគល់សិទ្ធិដល់មេធាវីរួចរាល់ហើយដែរ» ។

ការចេញទៅសម្តែងនៅលើទឹកដីនៃប្រទេសអូស្ត្រាលីនេះ វ៉ាន់ នីឡា ថានាងមានពេលច្រើនសម្រាកលម្ហែអារម្មណ៍ និងបំពេញការចង់បានរបស់អ្នកផលិតកម្មវិធី និងអ្នកគាំទ្រនៅប្រទេសអូស្ត្រាលី ។ ទន្ទឹមនេះ វ៉ាន់ នីឡា រំពឹងនឹងទទួលបានការលើកទឹកចិត្តពីជនរួមជាតិខ្មែរនៅអូស្ត្រាលី មិនខុសគ្នានឹងជនរួមជាតិខ្មែររស់នៅកម្ពុជាទេ ។ ការប្រឈមមុខនឹងបញ្ហាផ្សេងៗ គឺវ៉ាន់ នីឡា បានត្រៀមខ្លួនរួចជាស្រេចហើយដែរ ។

វ៉ាន់ នីឡា លើកឡើងថា ការចេញមុខជាសាធារណៈរបស់នាងជាបន្តបន្ទាប់នេះ គឺតបតាមការផ្តល់កម្លាំងចិត្ត និងមិនចង់ផ្តេកផ្តួលទៅតាមបញ្ហាប្រឈមនៅក្នុងជីវិត ហើយនាងនឹងតស៊ូជម្នះគ្រប់រឿងរ៉ាវដែលកើតឡើងនៅចំពោះមុខ។ ក្រោយពីវិលត្រឡប់មកពីប្រទេសអូស្ត្រាលីវិញ វ៉ាន់ នីឡា នៅតែបន្តការងារសិល្បៈ ខណៈដែលនាងនៅជាប់កិច្ចសន្យាជាមួយផលិតកម្មប្រមាណ២ឆ្នាំទៀត ។ បទចម្រៀង ថ្មីៗរបស់នីឡាជាច្រើនបទ នឹងបន្តចេញលក់ ។

កាលពីអំឡុងដើមខែមិថុនា លេចចេញរូបថតអាក្រាតមួយចំនួនរបស់កញ្ញាវ៉ាន់ នីឡា ហើយត្រូវគេចែកចាយតាមហ្វេសប៊ុក ។ កន្លងមកលោកសុខ ជំនោរ ជាបងប្រុសបាននាំកញ្ញាវ៉ាន់ នីឡា ចូលបំភ្លឺប្រាប់សមត្ថកិច្ចពាក់ព័ន្ធនឹងរឿងនោះ ៕